الخميس، 14 أكتوبر 2010

عن مصر والفلاحين ويوسف الصديق...من مخزون رسائلي الخاصة




أخي العزيز



أعتذر منك عن على تأخري في الرد لكنها المشاغل وعشمي أنك مقدر...



أنا حاسة زي اللي مضروبة على دماغي بشومة أصلا! المناوشات الطائفية (العوا وبيشوي) وخلع ابراهيم عيسى وفتوى بيع وتحطيم الآثار الفرعونية...ورا بعضه ورا بعضه! طاقتي الاستيعابية لا تسعفني!



بالأمس شاهدت إحدى حلقات مسلسل يوسف الصديق...فكرت أنه ياما مر عليك يا مصر أيام طويلة وصعبة...صراعات وكهنة وبلاط وسنين عجاف...ملوك وسلاطين وأنبياء... فيضانات ومومياوات وأهرامات ورسالات سماوية...ياااه...مولد! بلدنا فيها الخير والله يا أخي ॥صمدت أمام حاجات كتير...وماشية بقى لها آلاف السنين..



جال بخاطري سؤال امبارح وأنا باتفرج عالمسلسل...طب ليه ربنا مبارك في الأرض دي بالذات؟ ليه الأرض دي بالذات يبارك ترابها سيدنا موسى وسيدنا يوسف وسيدنا عيسى عليهم السلام؟ إيه في أرضنا أو شعبنا خلى ربنا يباركها على مدار كل السنين دي...ورجعت وسألت نفسي هل الأيام دي أصعب من أيام فاتت صعبة كتيرة مرت على بلدنا؟ ولا أنا اللي جزوعة؟



طيب نرجع لسؤالك....إحنا عايزين إيه من رئيس مصر اللي جاي مهما يكن شخصه ...وأنا باتأمل أمام حلقة يوسف الصديق امبارح جالت بخاطري الفكرة دي بس كانت مشوشة وانت يا أخي العزيز اللي بلورتها...أصل في حلقة ليلة أمس كان سيدنا يوسف عليه السلام وُلي خزائن مصر...وبدأ يستعد للسنوات العجاف


طبعا سيبك من تساؤلاتي الفلسفية الكتير عن فكرة "الرؤيا" والمنام وإرشاد السماء للبشر من خلال الأحلام لأنها حاجة بتدهشني جدا ... بس اللي أهم منها في سياق حديثنا كان ابنهاري بتوزيع الأدوار اللي سيدنا يوسف ابتدى يعمله...توزيع الأدوار على العامة اللي وثق فيهم وعلى الثقاة من حراس القصر...حط مشروع في هيئة سؤال: كيف نقي مصر شر سنوات الجفاف...ثم بدأ بدأ يضع مراحل: مرحلة أولى تجميع البذور من الفلاحين....وهكذا



كل دة وكهنة آمون كانوا يحيكون له المكائد ويحاولون خلعه...


إحنا عايزين كدة...حد يعمل مشروع نهضوي...على مراحل...ويختار الثقاة...ويوزع المهام



القمح...نبتدي بالأكل ...أنا كل يوم باقعد مع بواب العمارة أو مراته أو عياله...عنده بنوتة حلوة صغيورة باعلمها الرسم والكتابة في دقايق كل ما اشوفها وأنا طالعة ونازلة...كل مرة نتكلم بافكر البواب بأرضه...واسأله هل ممكن ترجع تزرع؟ ما هو إحنا نقدر نعيش من غير بوابين بس مانقدرش نعيش من غير أكل!!! ...الراجل مش ناوي يرجع بلدهم وليه حق ما يرجعش...الظروف ما تشجعش وهو عايز يعيش زي البني آدمين هو مراته وعياله...بواب العمارة اللي قصاد عمارتي نفس الشئ...نفس الحوار...نفس الكلام كل مرة أشوفه أسأله عن الأرض والزرع ونوصل لنفس النتيجة... ماينفعش يرجع للأرض والزرع و وجع "الجلب"



عايزين مشروع يلم الفلاحين دول ويصلب ضهرهم ويأمنهم



الفلاح ضهره عريان يا صديقي...مش مطمن...وصحته بتروح في الأرض والمقابل زهيد...و على رأي اللي قال القرية اللي كانت كلها مجتمع زراعي لما كان عفوا يعني واحد بهيمته تموت تقوم القرية كلها تلمله تمن بهيمة جديدة بقى مجتمع أفندية ومتعلمين مالهومش في "البهايم" ! مبقاش فيه مجتمع يتضمن مع الفلاح في محنته..والشباب مش لاقي شغل وبرضو زاهد في المزارعة ..يفضل يروح يشتغل في محلات الفاست فوود ولا يشتغل فواعلي بعد مسيرة تعليم طويلة فاشلة...



رئيس مصر اللي جاي لازم يكون جواه فلاح..ابن فلاح...



طيب..أفكاري مبعثرة...أفكر تاني ونستكمل الحوار



على كل لا تحزن يا صديقي...وكن بألف خير وادع لي بالخير



بإخلاص,