الجمعة، 11 فبراير، 2011

لوجه التاريخ: ساعدوني أجمع وأدون شعارات الثورة


يا جماعة...أنا دلوقتي باحاول أجمع وأدون شعارات الثورة لوجه التاريخ...المصريين بينوا كرامات كتير تصل لمستوى المعجزات التاريخية في الثورة دي, وعبقرية الشعارات العفوية الذكية واللي بتحرق وتوجع وتعلم وتضحك مش استثناء من الكرامات دي....فاللي على باله شعار يبعتهولي ...

اللي نجحت في تجميعه لحد دلوقتي:
الشعب يريد إسقاط النظام,
مش حنمشي هو يمشي,
ياشهيد نام واتهنى واستناني على باب الجنة,
علي وعلي وعلي الصوت اللي حيهتف مش حيموت,
عسكر عسكر عسكر ليه إحنا في سجن ولا إيه,
يا مبارك يا مبارك المحاكمة في انتظارك,
ياجمال قول لابوك الشعب المصري حيحاكموك,
شدي حيلك يا بلد الحرية بتتولد,
يا حرية فينك فينك أمن الدولة بيننا وبينك,
الجيش والشعب ايد واحدة,
حالوه يا حلوه مبارك شعبه ذله,
يا مبارك يا طيار جبت منين سبعبن مليار,
كنت فين يا علي حسني بيدور عليك,
آخر طلعة جوية حتكون على السعودية,
الصحافة فين الملايين أهم,
صح النوم صح النوم النهردة اخر يوم,
اعتصام اعتصام حتى يسقط النظام,
يا مبارك يا خسيس دم أخويا مش رخيص,
ثورة ثورة حتى النصر, ثورة في كل شوارع مصر,
يا سوزان قولي للبيه فندق جدة مستنيه,
كوندايزا كوندايزا شوفلنا لمبارك فيزا,
مصر حرة وحسني برة,
مبارك ..طير إنت,
واحد..اتنين..الجيش المصري فين,
دلعو يا دلعو, مبارك شعبه خلعه,

ساعدوني...كل اللي يفتكر شعار يبعتهولي وأنا حاحدث القايمة باستمرار

الخميس، 10 فبراير، 2011

فروح وريحان...


الفريق سعد الدين الشاذلي ...محارب بابتسامة طفل...لك أكاليل غار وجنات نعيم يا سيادة الفريق

السبت، 5 فبراير، 2011

أوصيكم ونفسي بالتوثيق


قبل ما يقطعوا علينا النت تاني...دعوة :كل اللي معاه قلم وورقة أو شاشة وكيبورد...اكتب ودون...ولا تنس التفاصيل...كل كلمة سمعتها من يوم 25 ...كل حوار دار بينك وبين سواق ميكروباص خلقه ضيقولا سواق تاكسي منفوخ من الفرحة والفخر..كل جرح في راسك أو ودنك بطوبة...كل مرة ميل عليك جارك أو صديقك يستلف منك فلوس عشان مزنوق في الأيام الصعبة دي وقسمت معاه اللقمة اللي في بقك من غير تردد...كل مرة وقفتك لجنة شعبية وادتك رقم سري أو كلمة مرور عشان تعدي من اللجنة اللي بعدها...قلتلهم إيه في اللجنة وقالولك إيه...كانوا بيشربوا شاي؟ بيدخنوا؟ بيضحكوا؟ متحفزين وخايفين؟ متفائلين؟ طب الست أم سامية اللي واقفة في البلكونة اللي في العمارة اللي قصاد بيتكو قالتلك إيه؟ اشتكتلك من إيه؟ دعت لمين ودعت على مين؟ وقالتلك إيه عن ميدان التحرير؟

قابلت أم شهيد؟ أخت شهيد؟ مرات شهيد؟ كانت حالتها إيه؟ ندمانة؟ فخورة؟ مذهولة؟

دعوة لوقفة تدوينية في وجه أي تدليس أو تدنيس محتمل لتفصيلات الانتفاضة الشعبية المصرية

السبت، 1 يناير، 2011

حين تستحيل "رباعيات الإسكندرية" إلى مراثي الإسكندرية


"الإسكندرية هي الأميرة والبغي, وهي المدينة الملكية والمؤخرة اللواطية, إنها لن تتغير أبدا طالما استمرت الأجناس المختلفة تضطرم فيها مثل عصير العنب الذي يتخمر في الراقود, وطالما ظلت فيها الشوارع والميادين تتدفق وتنبجس, وتتخمر فيها هذه الأهواء المختلفة والضغائن المتباينة والتي سرعان ما تهدأ فجأة, إنها الصحراء الخصيبة لعلاقات الحب البشري, تلك الصحراء المغطاة بعظام هؤلاء المنفيين فيها"***



*** لورانس داريل- رباعيات الإسكندرية