الجمعة، 11 فبراير 2011

لوجه التاريخ: ساعدوني أجمع وأدون شعارات الثورة


يا جماعة...أنا دلوقتي باحاول أجمع وأدون شعارات الثورة لوجه التاريخ...المصريين بينوا كرامات كتير تصل لمستوى المعجزات التاريخية في الثورة دي, وعبقرية الشعارات العفوية الذكية واللي بتحرق وتوجع وتعلم وتضحك مش استثناء من الكرامات دي....فاللي على باله شعار يبعتهولي ...

اللي نجحت في تجميعه لحد دلوقتي:
الشعب يريد إسقاط النظام,
مش حنمشي هو يمشي,
ياشهيد نام واتهنى واستناني على باب الجنة,
علي وعلي وعلي الصوت اللي حيهتف مش حيموت,
عسكر عسكر عسكر ليه إحنا في سجن ولا إيه,
يا مبارك يا مبارك المحاكمة في انتظارك,
ياجمال قول لابوك الشعب المصري حيحاكموك,
شدي حيلك يا بلد الحرية بتتولد,
يا حرية فينك فينك أمن الدولة بيننا وبينك,
الجيش والشعب ايد واحدة,
حالوه يا حلوه مبارك شعبه ذله,
يا مبارك يا طيار جبت منين سبعبن مليار,
كنت فين يا علي حسني بيدور عليك,
آخر طلعة جوية حتكون على السعودية,
الصحافة فين الملايين أهم,
صح النوم صح النوم النهردة اخر يوم,
اعتصام اعتصام حتى يسقط النظام,
يا مبارك يا خسيس دم أخويا مش رخيص,
ثورة ثورة حتى النصر, ثورة في كل شوارع مصر,
يا سوزان قولي للبيه فندق جدة مستنيه,
كوندايزا كوندايزا شوفلنا لمبارك فيزا,
مصر حرة وحسني برة,
مبارك ..طير إنت,
واحد..اتنين..الجيش المصري فين,
دلعو يا دلعو, مبارك شعبه خلعه,

ساعدوني...كل اللي يفتكر شعار يبعتهولي وأنا حاحدث القايمة باستمرار

هناك 16 تعليقًا:

NooN يقول...

يا شهيد نام وارتاح واحنا نكمل الكفاح

NooN يقول...

ثورة ثورة حتي النصر..ثورة في تونس ثورة في مصر
يا سوزان قولي للبيه كيلو العدس بعشرة جنية
ارحل يعني امشي ياللي مبتفهمشي
حسني اتجنن حسني اتجنن..(ودي بقي اللي هتف بيها الشعب لما سيادته امر بطيارات اف 16 تنزل عليناعشان تفرقنا)

NooN يقول...

ارحل ارحل زي فاروق شعبنا منك بقي مخنوق
ارحل زهقنا تعبنا

غير معرف يقول...

مش هانسلم مش هانطاطي احنا كرهنا الصوت الواطي
تغيير حريه عداله اجتماعيه
كلموه عبري مابيفهمش عربي
افتحوا ببان الحريه المظاهره دي سلميه

الله...الوطن...أما نشوف يقول...

شكرا يا شباب
ادوني أكتر :)

بحلم يقول...

"مش حنمشي من الميدان، حتي لو طلقت سوزان"
واستخدم هذا الشعار في الأيام الاولي عندما كثر القبض علي كباش الفداء من أجل تهدئة الناس

غير معرف يقول...

يا شهيد نام وارتاح واحنا نكمل الكفاح

قالوا علينا شباب كنتاكي واحنا يامصر روحنا فداكي


ودي النهارده بس
امن الدوله تاني ليه حسني راجع ولا ايه

غير معرف يقول...

بعد التنحي
مصر حره حسني بره

ريهام يقول...

مصر يا أم، ولادك أهوم، دول علشانك شالوا الهم

غير معرف يقول...

مش عايزنا نعدي ليه.. مش سلمية ولا اية


يابلدنا..ياتكيه..ياوسيه..سرقوكي الحراميه

بحلم يقول...

يا مبارك يا طيار..الطيارة في المطار

بحلم يقول...

يسقط يسقط أمن الدولة..احنا الأمن واحنا الدولة

عبد الرحمن سالم يقول...

أولاً: المدونة عجباني جداً والكتاب (الله..الوطن.. أما نشوف) أكتر من رائع ! (وبالمناسبة أنا شاريه من التحرير)

ثانيا: أنا والله فكرت في حاجات كتير ولقيتها كلها..
اللي فاكرها دلوقتي "يا جمال قول لأبوك .. 80 مليون بيكرهوك"

:)

تحياتي ليكي.

www.3een-wants-to-see.blogspot.com

غير معرف يقول...

يا حكمنا بالمباحث ... كل الشعب بظلمك حاسس

حركه وطنيه واحده .. ضد السلطه اللي بتدبحنا

Khadieja Eshra يقول...

كانوا بيقولوا " عضم ولادنا نلمه نلمه و نعمل منه مدافع .. و نداااافع "

Unknown يقول...


thx

شركه تنظيف