الجمعة، 24 أبريل 2009

آسفة!

الظاهر ان انا فعلا عندي مشكلة في التقيد بالقواعد ولوايح المؤسسات والتراتب الوظيفي والاقدمية والكلام الفارغ دة كله اللي بيشكل تقاليد مؤسساتنا العريقة...مش قادرة...مش عارفة...مافيش مكان عمل التحقت بيه الا وكان عندي مشكلة مع القوالب اللي بيحاولوا يحشروني فيها...وبصراحة تعبت من الاعتذار على تخطي قواعد ولوايح أنا أصلا مش مقتنعة بيها...وتعبت من العمل تحت إشراف أو رئاسة أشخاص بيقدسوا التقاليد والقوالب واللوايح والمتعارف عليه...ومش عارفة أعمل ايه! ما هو يا اللوايح تتغير يا أصحاب العمل يبقوا أكثر مرونة ويفهموا ان مش كل اللوايح تتطبق في كل الأوقات تحت كل الظروف وان الشكليات لما تعوق الوصول لهدف المؤسسة يبقى نجنب الشكليات ونسأل نفسنا "هو ايه الهدف من شغلنا؟" وساعتها يبقى تحقق الهدف من عدمه هو معيارنا الاهم, يا إما بقى انا ألم نفسي وأحط جزمة في بقي واتعلم اتبع القواعد من غير ما أمنطق الأمور كتير عشان ما اصطدمش بحد من البني آدمين اللي ربنا مسلطهم على مؤسساتنا دول, وأقتنع انه في الاول والاخر كله اكل عيش والسلام!وبلا أهداف كبيرة بلا خيبة قوية.
المشكلة دلوقتي اني مش عارفة اعمل دة...مش عارفة...ونفس "الخطأ" باكرره في كل مرة وفي كل مرة باضطدم برب العمل او المشرف المباشر والمصيبة اني لما باسأل نفسي دلوقتي: هل لو رجعت لنفس المواقف حتصرف بنفس الطريقة؟ بالاقي دماغي بتقوللي :اه! لو رجعت لنفس الظروف ونفس اماكن العمل مع نفس ارباب العمل ونفس القواعد حتصرف تاني بنفس الطريقة وحاكسر نفس القواعد وحاصطدم بنفس الاشخاص لنفس الاسباب!
الظاهر مافيش فايدة!

هناك 5 تعليقات:

وجهة نظري يقول...

دي مش مشكلتك لوحدك، دي مشكله عامه.

مش عارف حاعرف أوصلك مفهومي والا لأ لأني خيبه في الشرح :)

بس الحكايه بسيطه جدا: كل مؤسسه بتحدد خطوط دنيا للنظام حسب طبيعة عملها. كل مؤسسه حسب رؤيتها وحسب خطط نجاحها. المشكله مش إنتي، المشكله إن في ناس تانيه مش بيقدروا طبيعة عملهم وعندهم إستعداد "يبلطجوا" من غير شغل ويحاولوا ياخدوا أكتر ما يقدروا ويدوا اقل من المطلوب. وهنا بتيجي دور اللوائح علشان تنظم العمل.

ومع وجود ملايين الموظفين وملايين المديرين وملايين الشخصيات ما بين كل دا، مفيش حاجه ممكن تحكم دا غير اللوائح المنظمه. نفس فكرة القوانين، القوانين بتتحط عامه لكل الناس علشان النظام، وكلنا بنمشي حسب القانون.

بس شطارة المؤسسات في المرونه مش في تعقيد الإجراءات. أناإشتغلت في مؤسسه مصريه عريقه جدا، وكان معظم المديرين عندهم مرونه شديده، لدرجه أول يوم شغل وأنا لسه ألف باء جالي المدير العام وقالي: عرفت شغلك؟ قلتله عرفت حاعمل إيه. قالي: أنا عايزك في ظرف شهر تحط خطه لنفسك وتقلي حتمشي شغلك إزاي، لوحدك. مديرك المباشر هنا علشان يراقب إن دورك بيتأدي، إنما حتأديه إزاي، دي مشكلتك. أنا بعماك كبني أدم عنده مخ ومتعلم، لو عايز تتحط في إطار ونمشيك زي الألف، مفيش مانع، عندنا من دا، ومن دا. ... كان الله يرحمة قدوه، مش ليا بس ولكن لمصر.

مديرتي الله يرحمها كانت تقولي، ماتجيش تقولي عندي مشكله، تعالي قولي عندي مشكله ودا حلها، إنت لو المدير حتعمل إيه؟

ما علينا، شكلي بعدت عن الموضوع وبرغي كتير.

في مؤسسات، بيتزا هات مثلان بتفرض علي الوظفين زي موحد، كلام موحد، وطريقة عمل موحده، لو إتغيرت مفيش تفاهم.

في مؤسسات، مايكروسوفت مثلا، بتقول للموظفين أدي التكنولوجيا، أدي الخطه، عايزين شغل. تعمله في المكتب تعمله في البيت إنشالله تعمله في الحمام، مشكلتك، بس أدي التايم لاين وادي المطلوب.

ممكن يكون مفيش فايد زي ما قلتي، دا بيعتمد علي المشرف المباشر أو المدير او صاحب الشغل، وعليكي كمان. في الخر مش حتقدري تفصلي شغل علي مزاجك أو مدير يمشي زي مانتي عايزه، فيا إما تحاربي علشان أفكارك، يا إما تغيري المؤسسه.

Mohammad يقول...

دي أكتر حاجة أنا ندمان عليها في شغلي اللي قرب يخلص.. والمصيبة أنه كان أول وظيفة وأني اتعودت على كدة! أتعودت أقول رأيي وأنه لو رأيي مقنع يتنفذ، وأن المعيار الأول والأخير هو الإنجاز وإن القاعدة الكبرى هي الثقة. بجد قربت أعيط!

Mirrette يقول...

For onceI'll opt to comment.
NEVER GIVE UP ..don't submit...submission is the reason why those people exist...there is a big difference between submission and flexibility...there is nothing wrong with abiding by a certain organizational arrangement since we've chosen to be tehre to begin with, and we don't usually have the luxury of carrying our own prefrences and applying our utopias as we go around..but submitting to a rigid sterile "non-system"is totally different...they do get us the moment we give in..it is quite weird how we might be accepted to hold a position that embodies truly divine messages to deliver and worthy tasks that can actually make a difference, yet we are not allowed to outline an idea or rephrase a statement, or adapt a stupid rule to a needy situation!!or is it just the ego of those who think they definitly know better!!
never give in as long as you have a good reason to act in a certain way...you have a brain , and as long as it is one that functions, u should have a say..each of us is entrusted to grow and use a talent..and we owe it to ourselves to fight for succeeding in doing that...acting passively and submissively might very well save us the headache now and might even bring in some more coins(tragic as it is, even this doesn't always apply), but years from now we'll be left with nothing but the sense of pride before ourselves that we've fought for what we believe in...or not...

غير معرف يقول...

لما باسأل نفسي دلوقتي: هل لو رجعت لنفس المواقف حتصرف بنفس الطريقة؟ بالاقي دماغي بتقوللي :اه! لو رجعت لنفس الظروف ونفس اماكن العمل مع نفس ارباب العمل ونفس القواعد حتصرف تاني بنفس الطريقة وحاكسر نفس القواعد وحاصطدم بنفس الاشخاص لنفس الاسباب!



طيب ما انتى حليتى الموضوع اهه
عادى يعنى تتحرق اللوايح على اللى عملها
هو انتى زعلانة انك بتتخطى اللوايح والقواعد والقوالب اللى انتى مش مقتنعه بيها اصلا

اقولك على نصيحة : (اكسرى اى حاجة تقابلك مش اللوايح بس واعملى نفسك مش واخدة بالك ومفيش حاجة حصلت ومع الوقت هايتعودوا على كده)
هو لسة فيه لوايح فى 2009

تحياتى لحضرتك
حسام البدراوى

غير معرف يقول...

I seldom сomment, however I гead а lοt οf
rеsρonses on this page "آسفة!".
I ԁo havе 2 questiοnѕ fοr you
if it's okay. Could it be just me or do a few of these comments appear like they are left by brain dead folks? :-P And, if you are posting on other online social sites, I would like to follow you. Could you post a list of every one of your social sites like your linkedin profile, Facebook page or twitter feed?

Feel free to surf to my homepage; online casino
Also visit my page : online casino