طوبى للغرباء

حاسة باغتراب!

وكل ما انزل الشارع احس باغتراب

وكل ما اشوف الست اللي بتبلع النار والبنزين على قهوة الزهرة وهي بتقول" صلي على النبي ...اكل العيش مر يا ست...اكل العيش صعب يا بيه" احس باغتراب

وكل ما اكلم الحاجة سعدية وتقوللي ان معاش المرحوم جوزها معرفش كام وتلاتين جنيه احس باغتراب

وكل ما اقرا الجرايد احس باغتراب

وكل ما ابطل اقرا الجرايد احس باغتراب

وكل ما يبقى لي ورق عايز ختم النسر احس باغتراب

وكل ما ابص على المدونات احس باغتراب

وكل ما اسمع حاجة في موضوع المبيدات المسرطنة احس باغتراب

وكل ما اتكلم في قعدة حريمي مع بنات زي الورد حاسين باغتراب احس باغتراب

وكل ما اشوف مشاكل امي في شغلها احس باغتراب

وكل ما ادخن احس باغتراب

وكل ما ابطل تدخين احس باغتراب

وكل ما اسمع عن خطة عمل طموحة ومتفائلة لمكافحة الفقر في بلدنا وآجي ابص حوالي في الشوارع احس باغتراب

وكل ما احس باغتراب واقول للدكتور عندي اغتراب شوفلي حاجة أبلبعها تساعدني على التكيف يقوم يقوللي: اغتراب؟ طب وفيها ايه؟ طوبى للغرباء!